Anna Pritchard: Carthenni Enwau Eryri

About this event

Dyma arddangosfa arbennig sy’n cofnodi ac yn dathlu cyfoeth enwau tirweddol Eryri trwy gyfrwng y grefft draddodiadol o wehyddu gwlân. Mae enwau tirweddol hanesyddol yn cipio ysbryd lleoedd, yn sbarduno’r dychymyg ac weithiau’n ail greu’r bywyd beunyddiol, y trafferthion, y brwydrau a gogoniant yr oes a fu. O fewn chwe charthen wlân unigryw, cofnodir a dethlir detholiad o’r cannoedd o enwau tirweddol hanesyddol a gasglwyd mewn sesiynau a gynhaliwyd ar hyd a lled Eryri er mwyn casglu gwybodaeth am enwau tirweddol gan drigolion. Dyluniwyd y carthenni gan y gwehydd a’r dylunydd tecstilau, Anna Pritchard. Mae pob carthen wedi ei briodoli i ardal benodol o Eryri, a phob un â’i ddyluniad unigryw ei hun yn adlewyrchu rhai o nodweddion arbennig yr ardaloedd hynny. Arbenigodd Anna mewn gwehyddu ym Mhrifysgol Manceinion gan feistroli’r grefft ymhellach dan adain gwehyddion blaenllaw. O’i stiwdio fechan sy’n edrych draw am y Carneddau, mae’n dylunio tecstilau cyfoes ar gyfer y cartref a ysbrydolwyd gan siapiau a gwrthrychau cyfarwydd sy’n rhan o’n treftadaeth ddiwylliannol.

Location